درس تعليم السواقة تحول الى درس اسعاف

دروس تعليم السياقة (1 )
بعد ما اكتشفت اني وصلت اخر سنة في الجامعة و اني قريبا راح اتوظف ان شاء الله
اكتشفت اني ايضا ما عندي رخصة سواقة !!!
و الله الحالة بتكون صعبة في التنقل من و الى المستشفى خصوصا في مسقط..
المهم رحت شركة تعليم السياقة في مسقط و قلت لهم اريد اتعلم عندهم يوم 4-5 فبراير لان هذا الوقت اجازة
و حبيت اجرب لمدة قصيرة ما اربط نفسي معهم
و سجلت لمدة ساعتين درس يوم وحدة
و تواصلت بعدين مع المدرب
انه يجيني يوم السبت العصر ساعة 4
يوم السبت ::
رحت له عند المكان اللي خبرته عنه و رحت معه الى المعبيلة الجنوبية و وقف و سقت السيارة انا مكانه
انا : ايش اسمك ؟
هو : ابراهيم
انا: ...
هو: انتي من الجنوب ؟
أنا : ايوه.
و انا اسوق و الف يمين و يسار
صراحة اول مرة اسوق في مسقط
انا قد تعلمت في الجبل في طوي اعتير بس الوضع هناك مش زحمة و عادي
و اقدر اسيطر على السيارة بس المشكلة كانت معي في تبديل الجير )-:
ابراهيم : الشمج يسكن في صلالة ..
أنا : امممم طيب .
ابراهيم : اسمه خدا بخش
أنا فتحت عيوني ...اووووه يقرب لخدا بخش؟؟؟
امممم... اسمع عنه خدا بخش ... كان مائب الوالي عندنا.
ابراهيم : ايوه هو كان في طوي اعتير.
انا:زين انا من طوي اعتير
ابراهيم: انت دكتور ؟
انا: لا..طالب ...بعدني ما خلصت.
ابراهيم : ياخي انا تعبان .
انا /: سلامتك ايش فيك ؟
ابراهيم : بالليل احس بضيق في النفس.
انا : من متى؟ وهل هو لما تنام سيده ؟ تنام على كم مخده ؟ هل عندك الم في الصدر؟ تحس ترتاحي لما تقوم تجلس؟ تتعرق؟ تحس بالم في ايدك ؟ عندك كحة او حمى ؟ عندك الضغط او السكري؟ سافرت خارج عمان ؟ تعاني من الربو او الحساسية ؟ هل تحس بحموضة او حرقان في الصدر ؟
ابراهيم فتح عيونه و مستغرب ليش كل هذه الاسئلة ؟؟؟
و قال لي ان عنده السكري و الضغط و احيانا مش منتظم عليهم كثير ...
المهم كملت سيده و يسار و يمين و دوار و ما اعرف ايش
ههههههههههههههه

بعد نص ساعة ابراهيم حس بضيق في النفس وبسما فيه الم في الصدر او شي
قلت له راح اخذك المركز الصحي مال المعبيلة الجنوبية كنت اداوم فيه الاسبوع الماضي و اعرف مكانه
و نحن في الطريق
قال وقف وقف ..
وقفت السيارة و اشوف الرجال نازل و يحط اصابعه في حلقه!!!
انا : ايش تسوي!!!!!!!
ابراهيم : كذا ارتاح.. لما ازوع !!
أنا : لحظة ما تسوي كذا..اصلا بتحس بضيق في النفس اكثر..
الحين تحس بالم في الصدر ؟؟ او تحس بدوار ؟ او لوعان ؟
ابراهيم : لا.
انا كنت خايف يكون فيه جلطة في القلب او يكون السكر انخفض عليه.
انا : تاخذ انسولين او حبوب عشان السكر؟
ابراهيم : انسولين
كم تاخذ الصباح و بالليل؟؟
هو : 20 و 10
انا : صار لك اغمى عليك او انخفض عليك السكر فجاءة ؟
هو : ايوه احيانا .. و اكل حبات تمر.. و اكون بخير
انا : طيب عندك شي تاكله هنا؟
هو : لا
انا : راح اتصل بالاسعاف.
هو : لا .. عادي الحين بزوح و بكون بخير
و بعده يحاول يحط اصابعه في حلقه .
و رجع السيارة فتح المكيف و جلس بوجهه قدامه
انا جلست عنده قست نبضات القلب عن طريق الشريان اللي في اليد و حصلته مرتفع حوالي 120 و قست عدد مرات التنفس طلع 30 اكثر من المعدل الطبيعي و شفته بيتعرق. و عنده صعوبة في التنفس.
قلت راح اتصل بالشركة حد يجينا ناخذه المستشفى او بيته لان وضع ما يطمن صراحة
فجاءة قال لي: افعاس . افعاس
انا : ؟؟؟؟ ايش؟
هو : اسعاف..
انا : اهاا اوكي تمام ..
سيده اتصلت 999 ما راح !!!
بعدين اتصلت 9999
و خبرتهم ان عندي مريض بالسكري و الضغط يعاني من صعوبة في التنفس و ضروري اريد اسعاف تجي
حولوني الى مركز الاسعاف و خبرتهم عن وضعه
و خبرتهم وين نحن
و بعد يمكن 15 دقيقة وصلت الاسعاف
و اخذنا الرجال الى الاسعاف
لما وصلوا المسعفين
عطوه بختين تحت اللسان من نيتروجليسرين عشان يفتح شرايين القلب و حبتين اسبرين ياكلهن و اكسجين و شوية مورفين
و سوينا له مغذية و انا ركبت مع الدريول بعدما سكرت السيارة و اخذت المفتاح معي
و الشارع كان زحمة
و الدريول يضغط على الهرن و الازرار مال الصفارة
يمكن 4 ازرار عشان الهرن كل واحد يسوي صوت غير
بعدين صرت انا اللي اضغط و اجرب كل واحد
و في درجات للصوت عالي او منخفض او متوسط
من الدريشة كنت اشوف ورى على تخطيط القلب مال المريض
لان اذا كانت جلطة في شرايين القلب بتكون في تغييرات بعد نص ساعة
بس ما قدرت اشوف زين
المهم وصلنا مستشفى الجامعة و نزلنا ابراهيم مدربي
سبحان الله تدريب السواقة تحول الى تدريب اسعاف
ههههههههههههههه
الحين معي قناعة " توقع اي شي في اي وقت "
ممكن يصير مشكلة او شي فجاءة
و الواحد لازم يكون مستعد و يفكر شو يسوي و كيف يتصرف
المهم وصلنا المستشفى في الطوارى
خبرنا الدكتور عن المريض و كيف صار عنده المشكلة
قال لي: انت ولده "
قلت له : لا انا اتدرب معه وما اعرفه
المهم ركبنا عليه اكسجين على وجهه عشان يعيطه اكسجين 100% لان معدل الاكسجين كان نازل حوالي 85% و الطبيعي ما نزل عن 95% تقريبا
و اخذوا الدكاترة دم منه يفحصوا عن السكر وكان مرتفع شوية و الضغط مرتفع واصل 220|110
و الطبيعي 120|80
مرتفع جدا
من كثرة الضغط قلبه ما عاد قدر يضخ الدم و صار عنده تجمع للسوائل في الرئة و ما قدر يتنفس..
بعدين اتصلت بالمصري اللي يتشغل معه و خبرته يتصل باهله بس طلع ما عنده رقم حد من اهله
بعد 10 دقايق استقرت حالته و خبرته اني احتاج اتصل باهله و خبرني بالرقم السري مال التلفون و اتصلت باهله و خبرتهم ان حالته مستقر وهو في الطوارى بس يمكن يحتاج يترقد في المستشفى
بعدين جاء المصري اللي يشتغل معه و طمنته على ابراهيم و قال بروح
قلت له اجلس.. اريد اروح معك
راح نتظر اهله يجوا ...
المهم وصلوا اهله و استاذنت منهم ومن ابراهيم و شكرني
و ما عاد شفته من يومها ...
صرت اتدرب مع مدرب ثاني )-: و لنا في السواقة ايام و مواقف اخرى (-:
ههههههههههههه

غريب؟؟؟

استغرب في الناس ...واجد يقولوا لي اني غريب !!!!
ايش الغرابة فيني؟؟

و الله احس نفسي سهل التعامل
لاني واقعي و مسامح و غير متطلب
و ما اعصب بسهولة
حتى لو عصبت ما اظهر غيظي ...
الا في حالة تكرر نفس الازعاج من نفس الشخص...

يمكن هم يقولوا كذا لانهم تعودوا علي انا ما ازعل او اعصب على هذاك السبب في المرة الاولى ؟؟؟؟
طيب ليش ما حد يفهم ان الانسان ممكن ينسى او يطنش الامور في المرة الاولى عشان ما تصير مشكلة او سوء تفاهم بسبب موقف واحد
...
..
.
سبحان الله ... في بداية كتابة ما اعلاه كان شعور غير و الحين تغير تمام ...
ما اريد حد يقول اني مزاجي ... لاني فعلا مش كذا ...
.....
الحمدلله على كل حال...

غريب؟؟؟

استغرب في الناس ...واجد يقولوا لي اني غريب !!!!
ايش الغرابة فيني؟؟

و الله احس نفسي سهل التعامل
لاني واقعي و مسامح و غير متطلب
و ما اعصب بسهولة
حتى لو عصبت ما اظهر غيظي ...
الا في حالة تكرر نفس الازعاج من نفس الشخص...

يمكن هم يقولوا كذا لانهم تعودوا علي انا ما ازعل او اعصب على هذاك السبب في المرة الاولى ؟؟؟؟
طيب ليش ما حد يفهم ان الانسان ممكن ينسى او يطنش الامور في المرة الاولى عشان ما تصير مشكلة او سوء تفاهم بسبب موقف واحد
...
..
.
سبحان الله ... في بداية كتابة ما اعلاه كان شعور غير و الحين تغير تمام ...
ما اريد حد يقول اني مزاجي ... لاني فعلا مش كذا ...
.....
الحمدلله على كل حال...

ليه؟؟؟

ليه أحس اني و انا اشوفك حزين ؟؟؟
فعلا كلمات البدر تلامس القلب والفكر ..
ليه ؟؟؟

ليه؟؟؟

ليه أحس اني و انا اشوفك حزين ؟؟؟
فعلا كلمات البدر تلامس القلب والفكر ..
ليه ؟؟؟